Нурсултан Алтыбаев:“ Мыйзам боюнча корей тилин билмейинче университетке тапшыруу мүмкүн эмес”

0

Каганат.

 Бүгүн бизде конокто Түштүк Кореяда магистратурада билим алып жаткан мекендешибиз Нурсултан Алтыбаев болду. Ал чет өлкөгө билим алууга  кандайча барып калганы айтып, алдыдагы пландары менен бөлүштү.

-Эң алгач өзүңүздү тааныштырып кетсеңиз.

-Өзүм Кара-Кулжа районунун Терек айылында мугалимдин үй-бүлөсүндө төрөлүп эр жеттим. Ата-энем экөө тең өмүрүн мектепке, балдарга билим берүүгө арнаган инсандар. Бизди жаштайыбыздан зээндүү, зирек, ак-караны, жакшы-жаманды, адал-арамды айырмалоого, дайыма аракетчил болуп алдыга умтулууга үйрөтүштү.

– Эмне себептен Түштүк Кореяны тандадыңыз жана кайсы кесиптин ээси болуп чыгасыз?

-Алгач мектепти бүткүп жогорку окуу жайына тапшырдым. Ал жерден мамлекеттик жана муниципалдык башкаруу адистигине ээ болдум. Чынында башында Түштүк Корея эмес Европа же батыш өлколөрүнө барып билим алуу кыялым бар болчу. Бирок башка элдер таасир алган корей сериалдарынан мен дагы таасир алдым десем болот. Түштүк Корея абдан кызык жана жашоого абдан ыңгайлуу өлкөдөй сезиле берчү. Акыры тааныштарымдын досторумдун кеңеши менен Кореяны тандадым.

– Окууга кандайча өтүп калдыңыз?

Башында 2 жыл корей тил институтунда окудум. Окуу Сеулда жана чоң белгилүү университет болгондуктан окуу акысы дагы олчойгон болчу.  Бир жылдык контракт 6000 доллар эле. Кореянын мыйзамдары боюнча корей тилин кайсы бир деңгээлде билмейинче университетке тапшыруу мүмкүн эмес. Ошол себептен чет элдиктердин көбү ошол жерден тил үйрөнүп, андан кийин жогорку окуу жайына тапшырышат. Мен дагы тилди тиешелүү деңгээлде билгенден кийин Сеулдагы Ханян университетине магистратурага тапшырдым. Мен окуган окуу жай Корея республикасында алдынкы 5 университеттин катарына кирет жана жеке университет болуп эсептелинет. Тил үйрөнүп жүргөн кезимде ар кандай кыйынчылыктар болду, себеби ал кезде баардык чыгымды өзүбүз жабууга туура келчү. Бирок ошого чыдап аракет кылып окуп, кийин магистратурага өкмөттүк программанын негизинде бюджеттик орунга өтүп кеттим. Учурда эл аралык мамилелер адистигинде стипендия алып окуйм. Баардык чыгымдарды Кореянын өкмөтү каржылайт.

-Тил жагынан канттиңиз? Алгачкы күндөрү кыйналсаңыз керек?

Корей тилин бат эле үйрөнүп алса болот. Кыргыз тилине окшош жактары дагы бар. Кыргыздар, казактар үчүн корей тилин үйрөнүү бир топ жеңил.Ошондуктан тилден кыйналдым деп айтпайт элем. Жашоо шарты деле адамдар бат көнүп кеткидей. Ошондуктан кандай гана кыйынчылык болбосун бат эле жеңүүгө болот. Ал эми окууга келсек, окуу куралдарынан баштап окутуу системасына чейин башка болгондуктан албетте кыйынчылктар жаралбай койбойт экен.

-Окуу системасы Кыргызстандыкынан бир топ эле айырмаланып турса керек?

-Окуу системасын Кыргызстан менен салыштырып карап көрбөптүрмүн. Себеби салыштыра турган жагдайлар жаралган жок. Бирок албетте Кыргызстандан дагы өлкөнүн, университеттин кудуретине жараша билим ала алдым.

– Кореяда жашоо кымбатпы?

-Кореяда, Сеулда жашоо арзан деп айтууга болбойт. Сеул дүйнөдөгү кымбат шаарлардын катарын толуктап турат. Кыймылдап акча таап турбасаң, жалкоо болсоң кайырчыга айланып калуу бат эле. Бирок албетте ден-соолугу чың, күчтүү кишиге иш маселеси жаралбайт. Ар ким өзү менен өзү, бирөөгө башкасы карай турган мамлекет эмес. Эмгекчил, алдыга умтулган, билимдүү адам болбосоң корей жашоо шартында өз ордуңду бат эле жоготуп коюшуң ыктымал. Ошондуктан иште, окууда, жөнөкөй эле жашоодо атаандаштык абдан күч болгон өлкө. Айтор эмгек кылбасаң талаада эле каласың.

-Демек окуу менен ишти айкалыштырып турат экенсиз да?

– Негизи чет өлкөлүк студенттерге иштөөгө тыюу салынат, бюджетте окугандарга бул талап эки эс күчтүү. Белгиленген сааттарда гана иштөөгө мүмкүн. Бирок ар кандай жолдорун таап анча мынча каражат тапкандар да жок эмес. Көпчүлүк студенттер кафелерде, гид болуп,  котормочулук кылып иштеп турушат.

-Алдыга койгон кандай пландарыңыз бар? Кыргызстанга кызмат өтөгөнү келесизби?

-Ар бир адам алдына чоң максат коюп, ошол максатына жетүүгө аракет кылат эмеспи. Анын сыңарындай эле менде дагы бийик максаттар бар.  Азырынча эң эле маанилүүсү татыктуу билим алуу. Мен билимди Корея үчүн алып жатканым жок. Өнүккөн өлкөдөн алган билимимди өнүгүүгө бел байлап кадам таштаган кыргыз жериме арнайм деген тилегим бар. Бул менин Кореяга кете элек кездеги кыялым болчу.

-Чет жактан билим алууну көксөгөндөргө кандай кеңеш берет элеңиз?

Чет өлкөлөрдөн билим алууну көздөгөн жаштарга айтаарым, эч талыкпастан алдыга гана аракет жылуулары керек. Башка мамлекетте окуу канчалык кыйын болбосун ошончолук үзүрүн берет.  Жөн эле чет жерде окууну эмес, татыктуу билим алып, ал жерден жакшы нерселерди өзүнө сиңирип алуу максатын коюшсун.

-Рахмат! Окууңузда ийгиликтер болсун!

Булак: Каганат

Бөлүшүү:

Пикир

3 × 4 =