Россия Кыргызстандын 240 млн доллар көлөмүндөгү мурда берилген насыялык карыздарын кечүүдө

0

Каганат.

Жогорку Кеӊеште мурда берилген насыялар боюнча Кыргызстандын Россияга карызын жөнгө салуу тууралуу макулдашууга карата протоколду ратификациялоо тууралуу мыйзам долбоору каралып, үчүнчү окууда добуш берүүгө жөнөтүлдү.

Белгилей кетсек, 2012-жылдын 20-сентябрындагы макулдашуу менен Кыргызстандын 488,9 млн доллар көлөмүндөгү карызы эсептен чыгаруу аркылуу жөнгө салынган. Ал эми 2013-жылдын 22-майында Россия 188,9 млн доллар өлчөмүндөгү карызды иш жүзүндө эсептен чыгарган.

Макулдашууга ылайык, эсептен чыгарылган карыздын калган 300 млн доллары 10 жылдын ичинде, башкача айтканда, 2016-2025-жылдар аралыгында жыл сайын 30 млн доллардан эсептен чыгарылууга тийиш болгон. Ошондон улам, 2016-2017-жылдарда 60 млн доллар эсептен чыгарылган. Демек, 2017-жылдын 30-апрелине карата карыздын калдыгы 240 млн долларды түзөт.

КР Президентинин ушул жылдагы мамлекеттик иш сапарынын жүрүшүндө мурда берилген насыялар боюнча карыздарды жөнгө салуу тууралуу макулдашуу боюнча протоколго кол коюлган. Ага ылайык, Кыргызстандын карызын мөөнөтүнөн мурда жана бир жолу кыскартууга мүмкүндүк берип, карыздар толугу менен жокко чыгарылат.

Каржы министри Адылбек Касымалиевдин айтымында, 240 млн доллар өлчөмүндөгү карызды бир жолу эсептен чыгаруу ички дүӊ өнүмгө карата мамлекеттик тышкы карыздын деӊгээлин 3,8 пайызга кыскартып, ал жалпысынан Кыргызстандын мамлекеттик карызынын өлчөмүнө туура келет. Эгерде бул протокол ратификацияланса, Кыргызстандын Россияга карыздары толугу менен жоюлмакчы.

Депутаттардын пикиринде, Кыргызстандын башка өлкөлөрдүн алдындагы тышкы карыздарын жоюу жаатында да аракеттерди көрүү зарыл.

Бөлүшүү:

Пикир

4 × беш =